Հայացք օրաթերթ

Եռաբլուրում իբր 2700 ծառ է տնկվել, բայց իրականում ոչ մի հատ չի եղել

Իրականում կատարվե՞լ են Եռաբլուր անտառ-պուրակում նախատեսված աշխատանքները: Այս հարցը պարզելու նպատակով իրականացված ուսումնասիրությամբ ՀՀ վերահսկիչ պալատը (ՎՊ) սկանդալային բացահայտում է կատարել: 2011 թ. հոկտեմբերի 21-ին Երևանի քաղաքապետարանի և «Նոր Բարեկարգում» ՓԲԸ-ի միջև պայմանագիր է կնքվել 35059200 դրամով Եռաբլուր անտառ-պուրակի` Իսակովի պողոտային հարող լանջի կանաչ տարածքի հիմնման աշխատանքների համար: Պայմանագրի պայմանների համաձայն` նշված տարածքում պետք է իրականացվեին 20000 քմ տարածքի հարթեցման, ոռոգման ցանցի անցկացման և 2700 հատ ծառերի տնկման աշխատանքներ, այդ թվում` 2000 հատ սոճի և 700 հատ թխկի:

20.12.2011 թ. կազմվել է անտառ- պուրակի շահագործման ակտ, որում նշված է, թե պայմանագրի և ծավալաթերթ-նախահաշվի համաձայն կատարվել են բոլոր աշխատանքները (այդ թվում նաև` 2700 ծառերի տնկման), որի ընդհանուր գումարը կազմում է 35059200 դրամ: Սակայն, ուսումնասիրելով պայմանագրում նշված տարածքը, ՎՊ-ն պարզել է, որ 2 հա կազմող այդ տարածքում ոչ մի ծառ չկա, առկա են միայն նախահաշվով և ծավալաթերթով նախատեսված ջրագծեր, իսկ կառուցված ջրագիծը մայր ջրատարին է միացվել միայն 2012 թ. օգոստոս-սեպտեմբեր ամիսներին:

Պարզվել է նաև, որ «Նոր Բարեկարգում» ՓԲԸ-ն 2700 հատ ծառերը ձեռք է բերել 17.11.2011 թ. Սյունիքի մարզից, քաղաքացի Դ. Հովհաննիսյանից, որին ՓԲԸ-ն ստուգման օրվա դրությամբ պարտք է 10083000 դրամ: ՎՊ-ն լռում է, թե հիշյալ ընկերությունն ինչ է արել այդ ծառերը, եթե դրանք տնկված չեն Եռաբլուր անտառ-պուրակում: Հնարավոր չէ՞, որ «Նոր Բարեկարգում» ՓԲԸ-ն այդ ծառերը Երևանի մեկ այլ վայրում տնկելու մտադրություն է ունեցել, իհարկե, դրա համար Երևանի քաղաքապետարանից նորից կամ առանձին վճար ստանալու ակնկալությամբ կամ պայմանավորվածությամբ: Չափազանց ուշագրավ է, որ չնայած հափշտակության կամ, թեկուզ, հափշտակության փորձի վերաբերյալ վերոնշյալ փաստերից բխող կասկածին, ՎՊ-ի խորհուրդը համապատասխան նյութերը չի ուղարկել ՀՀ գլխավոր դատախազություն, այլ ընդամենն անարդյունավետ է որակել հիշյալ 10083000 դրամի «ծախսը»: Ակնկալում ենք, որ այս հոդվածը հիմք կլինի, որ գլխավոր դատախազությունն ինքն այդ ստուգման նյութերը պահանջի ՎՊ-ից:

Ընդգծենք, որ վերոնշյալը ՎՊ-ի հայտնաբերածի դեռ սոսկ չնչին մասն է: Երևանի քաղաքապետարանի ուժերով իրականացված շինարարության և հիմնանորոգման աշխատանքների նկատմամբ իրականացված վերահսկողությամբ ՎՊ-ն բացահայտել է 33195230 դրամի խախտում, որից 8 մլն 298 400 դրամի ծավալային հավելագրում և 24896830 դրամի անորակ աշխատանքներ: Ընդ որում, բոլոր օբյեկտներում չէ, որ ստուգումներ են կատարվել, այլ միայն 22-ում (11 օբյեկտ` 2010 թ. և նույնքան էլ` 2011 թ.), որոնք ընտրվել են պատահականության սկզբունքով` ընտրանքային կարգով:

Ստուգման ենթարկված բազմաթիվ օբյեկտներում բացակայում են օգտագործված շինարարական նյութերի որակի հավաստագրերը, արտաքին կոմունիկացիաների կատարողական գծագրերը, շինարարության վարման մատյանները լրացվել են թերի և սահմանված կարգի խախտումներով: Ավելին. պարզվել է, որ բացակայում են նաև բետոնի, ինչպես նաև տեղադրված խողովակաշարի փորձարկումների ակտերը:

Վերոնշյալ խայտառակ փաստերից կարելի է մի շարք հետևություններ կատարել: Առաջինը` այն, որ ոմանք, նրանց ղեկավարները նույնպես, 1988-ի աղետալի երկրաշարժից բնավ դասեր չեն առել: Երկրորդ` այս փաստերի վրա համպատասխան պաշտոնյաները ժամանակին աչք են փակել, և միայն ՎՊ-ն է, որ հայտնաբերել է դրանք: Երրորդ` խախտումներ կատարողներն իրենց անպատժելիության մթնոլորտում են զգացել և չեն էլ սխալվել, քանի որ նույնիսկ ՎՊ-ի բացահայտումներից հետո ոչ մի խոսք չկա նրանց քրեական պատասխանատվության մասին: ՎՊ-ի խորհուրդն իր ձեռքի տակ եղած նյութերը ՀՀ գլխավոր դատախազություն ուղարկելու վերաբերյալ որոշում չի կայացրել, բավարարվել է միայն Երևանի քաղաքապետին առաջարկելով, որ միջոցներ ձեռնարկի վերահսկողությամբ արձանագրված խախտումները և բացթողումները վերացնելու, ՀՀ պետական և համայնքային բյուջեներին հասցված վնասը վերականգնելու ուղղությամբ, առանձնակի ուշադրություն դարձնի իրականացվող շինարարական աշխատանքների և նախագծանախահաշվային փաստաթղթերի որակին:

Վերոնշյալ խախտումներից բացի, որոշ օբյեկտներում հայտնաբերվել են նաև այլ բնույթի խախտումներ: Մասնավորապես` Արարատյան առաջին զանգվածի թիվ 4/1 շենքի շինարարական կոնստրուկցիաների ուժեղացման աշխատանքներն իրականացվել են ոչ պատշաճ որակով կատարված նախագծային փաստաթղթերի հիման վրա` գծագրերը կատարված են թերի, տանիքների գծագրերում բացակայում են երկայնական կտրվածքները: Հանգույցների անհրաժեշտ մանրամասները թերի են:

Շինարարության ընթացքում որոշ հատվածներում անորակ են կատարվել առաստաղների, պատերի ջրաէմուլսիոն, ինչպես նաև յուղաներկման աշխատանքները: Անորակ են կատարվել նաև հավաքովի բետոնե 30x15սմ եզրաքարերի տեղադրման, B12.5 մակնիշի բետոնե սալվածքի կառուցման, B15 մակնիշի բետոնից միաձույլ բետոնե հենապատի կառուցման աշխատանքները:

Թերի են կազմված նաև Երևանի Արաբկիր վարչական շրջանի թիվ 28 նախակրթական ուսհաստատության շենքի հիմնանորոգման նախագծանախահաշվային փաստաթղթերը: Աշխատանքային նախագծերում բացակայում են գլխավոր հատակագիծը, շինարարության կազմակերպման նախագիծը, ինժեներական կոմունիկացիաների գծագրերը: Որոշ հատվածներում հարդարման աշխատանքները կատարված են անորակ:

Հիշյալ պալատը պարզել է նաև, որ Երևանի Մաշտոցի թիվ 33 հասցեում գտնվող Ս. Շահումյանի անվան դպրոցի շենքի ֆասադի ընթացիկ նորոգման և քարերի մաքրման աշխատանքների նախագծանախահաշվային փաստաթղթերը սահմանված կարգով համայնքի ղեկավարի կողմից համաձայնեցված չեն: Որոշ հատվածներում նորոգման աշխատանքները կատարված են անորակ:

Երևանի մի շարք համայնքներում իրականացված մանկապարտեզների ջեռուցման աշխատանքներում հայտնաբերվել են անորակ սարքավորումների և նյութերի (գազային կաթսաներ, ծխատար խողովակներ) օգտագործման դեպքեր:

Երևանի Սիսակյան թիվ 22 հասցեում կառուցվող բնակելի բազմահարկ շենքում իրականացված հանդիպակաց ստուգման արդյունքում պարզվել է, որ նախագծի ճարտարապետական մասը և աշխատանքի կազմակերպման նախագիծը կատարված են թերի, բացակայում են հատակների կոնստրուկտիվ գծագրերը, հատակների և ներքին հարդարման աշխատանքների մասնագրերը, մի շարք անհրաժեշտ մանրամասներ: Այստեղ էլ տեղում իրականացված ստուգումներից պարզվել է, որ ներքին հարդարման աշխատանքներում որոշ հատվածներ կատարված են անորակ: Օգտագործված նյութերի որակի հավաստագրերը ներկայացվել են թերի:

ՎՊ-ի մեղմ բնորոշմամբ, վերը նշվածը փաստում է, որ որոշ շինարարական օբյեկտներում տեխնիկական և հեղինակային հսկողությունը չի իրականացվել սահմանված կարգին համապատասխան (իսկ ընդհանրապես իրականացվե՞լ է...), ինչով խախտվել են ՀՀ քաղաքաշինության նախարարի 28.04.98 թ. «Շինարարության որակի տեխնիկական հսկողության իրականացման մասին» թիվ և ՀՀ քաղաքաշինության նախարարի 28.09.98 թ. «Շինարարության նկատմամբ հեղինակային հսկողության իրականացման մասին» հրահանգի պահանջները:

առավել ընթերցվող հոդվածները

օրվա լուսանկար

Պահոց

Եռաբլուրում իբր 2700 ծառ է տնկվել, բայց իրականում ոչ մի հատ չի եղել

ընթացիկ համարը