19092014
18°C weather in Yerevan
Հայացք օրաթերթ
335    
Նոր փաստեր` ՀՀ վարչապետ Տիգրան Սարգսյանի «օֆշորային գործից»

Նոր փաստեր` ՀՀ վարչապետ Տիգրան Սարգսյանի «օֆշորային գործից»

«Օֆշորային» սկանդալի առնչությամբ մեր նախորդ` «Ինչու է ուշանում օֆշորային սկանդալի հետ կապված վարչապետի իրական կամ կեղծված ստորագրության փորձաքննության եզրակացությունը» հրապարակման մեջ (nyut.am/archives/100074) բարձրացրել էինք այն հարցը, թե ինչու է ուշանում դեռ 2013 թ. սեպտեմբերին Կիպրոս գործուղված և այնտեղից ՀՀ ոստիկանության քննչական խմբի բերած փաստաթղթում (փաստաթղթերում) վարչապետ Տիգրան Սարգսյանի ստորագրության փորձաքննության պատասխանը: Հենց դրանից էլ պետք է պարզ դառնա` նրա ստորագրությունը կեղծվա՞ծ է, թե՞ մինչ այժմ ստել է` իրականում հենց ինքն է ստորագրել Կիպրոսում իր անունից (որպես բաժնետեր) «WLISPERA HOLDINGS LIMITED» և «A.B.S. GLOBAL LIMITED» ընկերությունների գրանցման լիազորագրերի կամ նշված ընկերություններում որպես բաժնետեր ձևակերպվելու փաստաթղթերի տակ:

Մեզ և հանրությանը հետաքրքրող վերոնշյալ հարցի պատասխանը ստանալու նպատակով, ՀՀ ոստիկանության հասարակայնության հետ կապի և լրատվության վարչությանը (ՀԿԼ) սեպտեմբերի 6-ին ուղղեցինք հարցում` խնդրելով պատասխանել հետևյալ հարցերին.

1. Կիպրոսի Հանրապետությունից ՀՀ ոստիկանության քննչական խմբի բերած համապատասխան փաստաթուղթը կամ փաստաթղթերը ե՞րբ և ո՞ր հաստատությանն են ուղարկվել փորձաքննության` դրանց վրա ՀՀ վարչապետ Տիգրան Սարգսյանի ստորագրության իրական կամ կեղծված լինելու հանգամանքը պարզելու նպատակով:

2. Փորձաքննություն իրականացնող մարմնին նշված փաստաթղթի կամ փաստաթղթերի հետ միասին ուղարկվե՞լ են ՀՀ վարչապետ Տիգրան Սարգսյանի ստորագրության համեմատելի նմուշ (նմուշներ) պարունակող փաստաթուղթ (փաստաթղթեր):

3. Ստորագրության (ստորագրությունների) ինչպիսի՞ (քիմիական և այլն) փորձաքննությունների խնդիր է առաջադրվել փորձաքննություն իրականացնող մարմնին կամ փորձագետին:

4. Եթե ստացվել է փորձաքննության եզրակացությունը, ապա ե՞րբ, ի՞նչ է պարզվել փորձաքննությամբ:

Եվ, ահա, երեկ հիշյալ վարչությունից ստացանք մեր հարցման պատասխանը, որը դուրս էր նույնիսկ պատասխանի հնարավոր բովանդակության վերաբերյալ մեր ենթադրությունների շրջանակից: Ինչ-ինչ, բայց ոստիկանությունն իսկապես ունակ է զարմացնելու: ՀԿԼ վարչությունից ստացված պատասխանը մեջբերում ենք նույնությամբ.

«Ձեր 06.12.2013 թ. հարցմանն ի պատասխան` հայտնում ենք, որ ոստիկանության քննչական գլխավոր վարչության ՀԿԳ քննության վարչության վարույթում քննվող քրեական գործի շրջանակներում Կիպրոսի Հանրապետություն ուղարկված իրավական օգնություն ցուցաբերելու մասին միջնորդության կատարման արդյունքում ստացված երկու փաստաթղթերի պատճեններում ստորագրություն կատարած անձանց պարզելու նպատակով` 2013 թվականի նոյեմբերի 11-ին նշանակվել է դատաձեռագրաբանական փորձաքննություն, որի կատարումը հանձնարարվել է ՀՀ ԳԱԱ «Փորձաքննությունների ազգային բյուրո» ՊՈԱԿ փորձագետներին:

Փորձաքննության իրականացման համար փորձագետներին տրամադրվել են նաև ՀՀ վարչապետ Տիգրան Սարգսյանի ստորագրության ազատ նմուշներ:

2013 թվականի նոյեմբերի 14-ին փորձաքննության կատարումը ժամանակավորապես դադարեցվել է մինչև հետազոտելի փաստաթղթերի բնօրինակների տրամադրումը:

Հիշատակված փաստաթղթերի բնօրինակները ստանալու նպատակով Կիպրոսի Հանրապետության իրավասու մարմիններին ուղարկվել է նոր իրավական օգնություն ցուցաբերելու մասին միջնորդություն, որի պատասխանը դեռևս չի ստացվել»:

Պատասխանից պարզ է դառնում, որ ՀՀ ԳԱԱ «Փորձաքննությունների ազգային բյուրո» ՊՈԱԿ փորձագետներին տրամադրվել են երկու փաստաթղթերի պատճեններ: Բնականաբար, հարց է առաջանում` ի՞նչու դրանց պատճենները, և ոչ թե` բնօրինակները: Ոստիկանությունից, իհարկե, կարող են ասել, որ պատճեններն են ուղարկվել փորձաքննության, որովհետև Կիպրոսից հենց դրանք են բերվել կամ ստացվել: 2013թ. սեպտեմբերին Կիպրոս մեկնած ՀՀ ոստիկանության քննչական խումբը Կիպրոսի դատախազության հետ համատեղ քննչական գործողություններ է իրականացրել` Կիպրոսում գրանցված օֆշորային երկու ընկերությունների հետ վարչապետ Տիգրան Սարգսյանի առնչությունը պարզելու նպատակով Կիպրոսից քննչական խումբը բերել է ընկերությունների ռեգիստրում առկա փաստաթղթերը: Հիմա ոստիկանությունից ասում են, որ ձեռքի տակ եղածը ոչ թե փաստաթղթեր են, այլ դրանց պատճենները:

Հենց այստեղ էլ ընդգծենք, որ ՀՀ ոստիկանության քննչական գլխավոր վարչության հատկապես կարևոր գործերի քննության վարչության վարույթում քննվող քրեական գործի շրջանակում Կիպրոս գործուղված քննչական խմբի անդամներին, ինչպես նաև Կիպրոսի դատախազության աշխատակիցներին պարզապես չէր կարող հայտնի չլինել, որ փաստաթղթի պատճենով հնարավոր չէ պարզել այդ փաստաթղթի բնօրինակի վրա եղած ձեռագրի կամ ստորագրության պատկանելությունը որոշակի անձի: Ախր դա հայտնի է սովորական քննիչներին ու նույնիսկ իրավական թեմաներով գրող լրագրողներին և իրավաբանականի ուսանողներին, ՀԿԳ քննիչներին կամ հատկապես կարևոր գործերի քննության վարչությանն ի՞նչպես կարող էր նախապես հայտնի չլինել...

Մեզ հետ զրույցում ՀՀ ԳԱԱ «փորձաքննությունների ազգային բյուրո» ՊՈԱԿ-ի տնօրեն Արտաշես Ջավադյանը հավաստեց, որ փաստաթղթի պատճենով հնարավոր չէ պարզել ձեռագրի կամ ստորագրության պատկանելությունը որոշակի անձի: Ստացվում է, որ Կիպրոս գործուղված քննչական խմբի անդամները պետբյուջեի կամ հարկատուներիս միջոցների հաշվին այնտեղ անիմաստ ժամանա՞կ են վատնել, զբոսաշրջային հաճույքնե՞ր ստացել: Գուցե հետո՞ էլ այդ կամ մեկ այլ քննչական խումբ երկրորդ այցելությո՞ւնը կատարի Կիպրոս, այս անգամ` բնօրինակների հետևից:

Եթե մի պահ նույնիսկ ընդունենք, թե հիշյալ փաստաթղթերի պատճենները ոչ թե Կիպրոս գործուղված քննչական խմբի անդամներն են իրենց հետ բերել, այլ դրանք Կիպրոսից ստացվել են նրանց վերադառնալուց հետո, միևնույն է, ՀՀ ոստիկանության քննչական գլխավոր վարչության ՀԿԳ քննության վարչությունից դրանք փորձաքննության համար չպետք է ուղարկեին ՀՀ ԳԱԱ «փորձաքննությունների ազգային բյուրո» ՊՈԱԿ` քաջ գիտակցելով, որ ժամանակի վատնում է լինելու: Իսկ գուցե այս դեպքում անիմաստ չէ՞ ժամանակի վատնումը... Չէ՞ որ հենց այդ փորձաքննության արդյունքից է կախված` ՀՀ վարչապետ Տիգրան Սարգսյանը մնո՞ւմ է իր պաշտոնում, թե հեռանում կամ հեռացվում:


ընթացիկ համարը